QUISTIONI DI FEELING

Mi rrussigghjai di botta stamatina,

ca’ testa di’ pinzeri tutta china.

Di quandu nascìu l’associazzioni

cu nui, amici, personi degni e bboni.

Tutt’insiemi iucammu e currimmu

‘nda stati, e poi i castagni e i crispedhi

e puru i nucidhi ‘ndi ‘mbintammu

mi ‘ndi divirtimu ‘nde’ strati, pedi, pedi.

‘Ndi scialummu tutti randi e picciridhi

mi jucamu a ‘ngiru puru ‘e petrulidhi,

parteciparu tutti, mancaru sulu pulitici

e mministratori, a mmenz’a tanti amici.

Ancora ‘i tandu non passaru setti misi

e i scomitammu a tutti, puru a Nisi.

Non ‘nd’era rispundutu mai, fina a ora,

si sintiu ffindutu, pi casu, i na palora

pubblicata supra o situ d’internetti

e si pungìu ‘ndo bbonu senza rispetti.

‘Ndi dissi: chi sempri fu da nostra parti,

chi ‘ndi iutau sempri senza distinzioni,

e nu ‘nci rispundimmu ca mala ducazioni.

Da parti nostra non ci fu scortesia,

fustivu vui chi ‘ndi chiudistivu a via.

A cullaborazzioni e a prisenza

pi vvui non fu ‘na cumbinenza.

Forsi pinsava chi ccà ‘nci sunnu fissa,

forsi pinsava chi simu tutti storti,

‘ndaccurgimmu sì, di undi veni a missa

chi cantunu tistuni, da matina e sira,

mi si sentunu curaggiusi e forti

pi ‘i fussatoti finora senza spira.

Pi tri vvoti i chiamammu nui a partecipari,

non rispundiru mai ‘nda so’ rraggiuni,

e ora dinnu chi si sentunu ffinduti pari pari,

povir’omini,  oramai si sentinu ddiuni.

E pi ffari n’offesa a tutti i fussatoti

trovunu modu mi jocunu, soddi dandu

a cu cerca in fretta e furia, ma poti

pi ll’amicizzia chi teni ‘ndo cumandu.

Si ‘nfina a ohi i fussatoti ne pottinu vidìri,

figuramundi ora, dopo chi mandaru dhi bbulletti

chi mancu ‘e ricchi bbuluni fannu rridìri,

pi numira chi portunu, sunnu sulu barzelletti.

E ‘ndannu u curaggiu e mancu a mmucciuni

mi dinnu ch’è ‘na leggi, ‘na leggi du cumuni,

Tutti annu a pagari, pena i ll’interessi

di mora, sinnò non ponnu pulizzari cessi.

E ssi capita pi casu chi ll’acqua chi cunsumi

è di menu di chidha chi ‘ndo puntaturi rilevaru

à pajari u stessu a tassa senza mi rraggiuni,

si ‘ndai o no l’allacciu, è cusì,  non c’è riparu.

Si vidi chi ll’acqua da to casa aumentau

i metri cubbi chi signaru ‘o puntaturi,

pi opira i carcunu di quantità si llargau,

o pirchì non sapisti usari u pisciaturi.

Si non si llacciatu e fogni non è’mpurtanza

idhi i ficinu longhi, pi tutta a cittadinanza.

Ma non sapimu a undi sunnu llocati,

mancu si facimu ‘nterviniri l’abbucati.

Tuttu va bbeni pi jdhi,  nu 'nc'è spiranza

mi nnullunu pi tutti i fussatoti l’ordinanza

c'a menzu raccumandata, du postinu consegnata

i soddi chi ‘ndi cercunu, pi nnui, na gran mazzata.

Chistu esti u paisi i Giufà s’avi a pinzari,

cu si russigghja a matina non sapi comu fari,

ti ‘mbenta na tassa, tantu paga u cittadinu

si parra di ll’acqua di fogni e non di vinu!

E’ sulu quistioni di feeling sig. Sindìcu,

si vuliti i palori non mi jittati o ventu

si vuliti esseri di nu tutti veru amicu,

libbiritavi di preggiudizzi, ma senza stentu.

Rricurdativi chi parrandu si cquista cunpidenza

cu cittadinu fussatoto, non sempri dilinquenza.

Siti ‘nda ssu postu pu populu suvranu

chi prima o poi non vi dà cchiù manu.

‘Mporta pocu si pi vvui è l’urtima liggislatura

pi vui va bbeni sempri e  senza cumplimentu,

finistivu di cumandari a tutti comu o ventu.

Ma pi vostri amici non sacciu quant’è dura

quando di votazzioni comunali rriva l’ura.

Non voggju e non penzu ‘i minacciari

chistu vulistivu e chistu v’amu a ddari.

‘Ndavistivu u tempu mi vi faciti benvuliri,

sbagliastivu i pirsuni chi ‘ndaviti attornu.

E u popolu chi pensa, non s’avi a ricridiri

u rispettu chi purtati non è sulu bongiornu.

Non vogghju fari u giudici, m’ati a scusari

è sulu nu malidittu sfogu i nu mumentu

chi nesci d’intra du me cori e l’eppi a ffari

pi quistioni di principiu e pirchì mu ssentu.

Anonimu Fussatotu

CRONICA PAISANA

Pi chidhu chi vi cuntu ora

non ‘nci criditi na palora.

E’ tuttu ‘mbntatu ‘i mia

sulu pi ‘mbidia e gelosia.

Paisanu nu consigghju ti voggju diri:

l’acqua du cumuni tu non ‘mbiviri

rischi a depurazzioni ch’a a pagari,

si po’ fari ammenu, tu non pisciari.

Cogghji tuttu e ‘ndo tò giardinu

e ampena faci jornu ogni matinu,

sbacanta puru vulendo u tò rrinali

ancora, pi chistu, non c’è tassa comunali.

Ora vi cuntu me’ cari paisani

chidhu chi succedi ‘nda sti chiani.

Oramai ‘ndavi cchiù i carchi misi,

chi pi fussatoti rruvvaru tanti bbisi.

Raccumandati, lavuru pu pustinu,

firmati ccà, sta littira è pi vvui,

avanti e arretu poviru Pascalinu,

pigghjati ccà, ancora n’atri ddui.

Cusì scoprìu u poviru fussatotu

co’ paisi ‘nci sunnu i fognaturi,

e, chi dill’acqua chi cunsuma,

avi a pajari puru a depurazzioni.

Allarmatu a chiazza ‘mpari Totu,

u cugginu Micu e puru Sarbaturi

i cursa jiu, senz’atru mi si dduna

‘nci rrivau a tutta a populazzioni?

A parti l’acqua, e a fognatura

rruvaru puru i passi provinciali.

Bulletti rrivaru a tutti pari pari,

rjalu da Bbefana e du Natali.

A ccui triccentu,  quattrucentu,

setticentu e fina a mille e ddui

i pigghjaru a tutti, e pi sbintura

fin’all’urtimu euru s’av’a virsari.

Passatu i cursa u sbandamentu

e liggendu meggju i carticedhi

si ‘ndaccurgìu ognunu di l’ingannu.

I numira ‘nci sunnu pari chiaru,

l’acqua du cunsumu raddoppiaru

‘nda depurazzioni ‘i tuttu l’annu.

Non si sapi pi qquali di misteri

‘i cursa cumbinaru stu pastrocchju:

<L’acqua chi cunsuma u fussatotu,

dopu chi passa n’nda so panza,

aumenta tantu e, foramalocchju,

dopo che ssignata o puntaturi,

sbuca ‘nda condotta comunali

di metri cubbi senza ugguali.

‘Nci capitau puru a carchidunu

ca littura ‘nci fu fatta l’atru hjeri ..

du 1903 dicembri jornu trentunu.>

E guardandu beni quant’è scrittu,

iaprendu l’occhj, sunnu cosi veri,

sbagliaru puru u codici fiscali

du soggettu signatu ‘nda bulletta,

pa prescia ‘i fari ‘i cosi in fretta!

Si pignoli fin’all’urtimu avimu a ssiri,

e si ll’acqua chi ‘mbivimu non è fina,

‘nda depurunu all’acquedotto? vò vidiri,

e poi a mandunu pulita,  pa Salina.

Pa bbasciu fina o depuratori comunali

pa pulizia da mmerda e da pisciazza,

chi tu scapùli a muzzu fora du rrinali,

è chistu ca genti senti diri ‘n chiazza.

E ti fannu cridiri ch’è sulu a tua

chidha chi passau ‘nde cuntaturi,

prima tu mi t’ambivi ‘nda to panza,

e à pajari u scomitu, senza lagnanza.

O ta teni stritta, stritta ‘nda to rua

o ti mandinu di cursa u spignaturi.

Du ddumilaeddui fina o ddumilaesetti

i metri cubbi i fogna furu depurati,

chistu e nu misteru, i fogni senza effetti

non si sapi quandu furu cullaudati!

Passamu ora a tassa provinciali

supra ‘e passi carrabbili stradali.

Tempu arretu smalizziati giuvinotti

misuraru cu metru e ca rrullina

tutti i cancedhi di nostri paisani,

non dassaru arretu nudhu, maliditti.

ficiru 'na struggia, 'na gran ruvina.

Dumandandu o primu chi ‘ncuntraru:

<ccà i cui è?, comu si chiama u patruni

di stà casa?>, signandu ‘nde riggistri

i nomi, i cugnomi du paisi paru, paru.

Ruvvaru puru sti rridiculi balzelli

pi tutti i fussatoti, brutti e belli;

unu, ddui e puru tri passi carrabbili

signaru a tassa a tutti, i miserabbili.

A tutti i fussatoti ora i cursa ‘nci cumbeni

mi si fermunu a posta e, ca pinzioni,

mi pajiunu prestu tutti sti funzioni.

Non c’è cchiù mundu, non c’è cchiù beni,

a postu du vistiri e du mangiari

sti servizi umbra s’annu a pajari.

Anonimu Fussatotu

E’ CURPA ‘ILL’ACQUA MINERALI

Finarmente l’atru jornu u fussatotu

o comuni guerra aperta dichiarau.

Bbisati pi tempu i nostri paisani

scindiru ‘n chiazza, malati e sani.

Vinni l’associazzioni du cunsumu

e ‘nci circau i bulletti ad unu a unu.

A fila mi trasinu ‘nda ll’ufficiu

rrivava lungu tuttu u municipiu.

Cu spingiva i ccà, cui i dhà

vulivunu trasiri a llà prillà.

Stabilita a carma, allura l’abbucati

‘nci dumandaru a tutti lu so nomi,

viniti avanti, vui comu vi chiamati?

purtastivu a fattura? cuntatimi u probblema!

Eu sugnu Caiu Semproniu i Santuluca,

guardati da bulletta a terza culonna:

acqua cunsumata metri cubbi ottantatri.

E po’ vidi ccà, miraculu i Madonna

acqua depurata metri cubbi triccentutri.

Bbeni, capiscìa comu e quali fù u sistema,

firmati ccà ssutta, ora nudhu vi ffuca.

Dicitimi l’acqua chi ‘mbiviti è da funtana?

Vussia comu a tanti a pigghju a castagnara;

sapiti com’è, a casa, ‘nde rrubinetti cala terra

‘mbivu i dhaà e ‘nda me panza è comu a guerra,

na rrivoluzzioni si scatena è comu na cagnara

di budedha, e mi doli a panza tutta a settimana.

Avanti n’atru, viniti ora tocca a vvui,

liggiti puru i numira da vostra carticedha.

Prima mi finimu sintimu puru n’atri ddui

è giustu mi scutamu puru a Ciunchedha.

Sapiti lu me nomu esti Pincu Pallinu

ogni tantu, comu puru a mme cumpari,

jincu i bbiduni ‘ill’acqua di branchinu.

Vi cuntu puru lu talornu, è u mè sbarruari.

Comu a chidhu chi poc’arretu precedìu

l’acqua signata o puntaturi, ora va pigghju,

miraculu veru da Madonna i Bboncunsiggju,

pi fognaturi da cumuni pi mmisteru triplicau.

Grazzii, scusati caru amicu mintitivi di parti

tocca o prossimu, signati puru a vostra firma

e faciti postu, vogghju ancora ‘na cunfirma

si ‘nci sunnu pi ccasu di novu stessi carti.

A mmia mi chiamunu mastru Giuseppi

e ll’acqua pi mmia e a m’e famigghja

vaiu e a ccattu a Melitu, o supermercatu.

e chidhu chi mmi custa mai non seppi.

Ma si vvuliti sapiri, l’acqua comunali,

a usu sulu mi lavu i bbudedha di maiali.

‘Nda m’e bulletta, grandi maravigghja,

triccentuottantanovi metri ‘ndavi signatu.

N’atru amicu mmusstra a tutti a so bulletta,

stati videndo ch’è sulu na randi barzilletta.

Finarmenti cumbintu dissi l’abbucatu

vi svelu a vvù tutti u misteru di Fussatu.

Scutandu a vvui truvai a soluzzioni

dill’aumentu ill’acqua ‘i depurazzioni.

U problema è chiaru facili a risurbìri.

Facimu cuntu chi vvu tutti, i fussatoti

‘nda n’annu cunsumastivu, tantu pi ddiri,

centumila metri cubbi d’acqua comunali

e ‘nde fogni scapulastivu, comu vi dinnu

quattrucentumila metri, sarbu l’ingannu.

A curpa è a vostra, pirchì l’acqua minerali

e di surgenti a quantità vu vi ‘mbivistivu,

senza tiniri cuntu chi ppòi a  pisciastivu.

Eccu pirchì ‘nc’è sta randi differenza!

‘Mbivitivi puru l’acqua di campagni,

‘nci penza poi u cumuni mi misura

chidha chi trasi tutta ‘nde so fogni

non è a sua, u stessu manda la fattura.

Chi vvuliti mi vi fazzu, è u me lavuru

non pozzu difendiri ‘i ll’atri l’imprudenza,

non ‘nc’è spera di luci ‘nda stu scuru.

E ora iti e pajati puru tutti lu cunsumu

e ‘nsignativi mi ‘mbiviti ill’acqueduttu

armenu ‘ndaviti piaciri a unu, a unu

mi diggiriti bbonu, faciti puru carchi ruttu.

U sindicu cu tutta la so mministrazzioni

pritendi mi saldati a tassa ‘i depurazzioni,

e non ‘nc’è scampu  mancu p’i malati

jiti e pajati ‘i cursa ‘i cunti tantu salati.

Anonimu Fussatotu

STI FACCI ‘I ‘MPIGNA

Comu ‘nda st’urtimi tempi forsi putistivu liggìri

‘nde ggiurnali, speci ‘nda cronica paisana,

cu Comitatu spuntaniu fussatotu Sgro Lioni

‘ncuminciau mi scrivi chidhu c’ognunu poti vidìri.

Cimiteri all’anchi all’aria, strati chini i fossi,

bulletti strani, fiumari ‘nquinati e cosa strana

senza mai risposti da parti i ll’Amministrazioni.

Anzi, o cuntrariu,  cu curaggiu sempri ribattiru

chi nno n’è vveru nenti, tuttu chidu chi scriviru.

Ma stamatina sfugliando “U Quotidianu”,

n’articulu a ottu culonni pi tutta a paggina

parrava da denuncia fatta i ll’Associazioni,

di condizioni di puzzi e di fiumari di fussatu.

Strambandu l’occhi liggìa i cursa d’un hjatu

cu Sindicu insiemi all’assessori all’ambienti

si prioccupa di chidhu chi succedi a ggenti.

Di cursa fici fari u soprallocu da guardia

e du geomitra comunali, e si rindiu cuntu

c’a situazzioni è traggica, ma cu rabbia

dichiara chi pigghjau di tuttu, bell’appuntu.

Ringrazzia puru tutti i ll’Associazzioni

chi ‘nci ficinu vidìri beni a situazzioni,

e ‘ndavi a faccia tosta mi dici e mi cunferma

chi suggerimenti dati  sempri a ccu guverna,

sunnu bonu signu di cullabburazzioni.

Ma u sindicu ‘nda so menti non ricorda beni,

a tutti l’articuli chi ficinu non rispundiu mai,

i trattau mali, dicendu chi forsi non cumbeni

mi si mentunu cuntra a idhi, sunnu rossi gguai!

E ora, ampena du ggiurnali l’articulu liggìa

senti chi ti senti, resti puru sulu frasturnatu

u sindicu dichiara: mi sta a ccori puru fussatu,

palori, sempri palori ‘nda so bucca eu vidìa.

Nenti nenti, vò vidiri, ‘ndo frattempu si pintìu

du passatu so rraggiunamentu e porgi a manu

e cittadini soi chi fin’ora u trattaru di villanu?

di sti voltafaccia spiriamu beni, ‘ndi sarbi Ddiu!

Non è facili cridiri a stu bellu cuncettu

dopo chidhu chi ffici, senza rispettu.

Non mi cumbincinu tutti i dichiarazzioni

chi desi ‘nde ggiurnali a destra e manca,

a gente du paisi non poti cchiù, è stanca

di sti fissiamenti, pretendi a randi vuci

mi si libbira prestu di st’Amministrazzioni!

A so prutesta non pot’essiri chhiù, dduci.

E pensu quantu faccia tosta ‘ndannu

mi nesciunu ancora o chianu ‘ndo paisi,

cridinu all’urtima cursa di guadagnu

ora chi ‘nci rristaru, sulu pochi misi.

Dicivinu i nostri nonni tempu arretu

senza traviamenti e senza virgogna

si lavinu puru a bella facc’i ‘mpigna,

cridendu chi tenunu u paisi sempri quetu.

Anonimu Fussatotu