Fussatoti  pinsirùsi  3

 Giuvanni,  Carmelu  e  U MALU SPIRITU

Uuuh….uuuh….uuuh.

Tri vibbrazzioni e u cellulari mmutìu. Carmelu vitti ndo disprei à forma dà busta, capiscìu chi nc’era nu messaggiu  e japrìu mi leggi e liggìu: “urgt vdmc slt pst nd chzz, cnfrm, firmato Gvnn”. Carmelu si misi in pinsèru pì stu messaggiu cifratu e si misi puru in aggitazzioni pinsandu non mi nci succidìu carcosa i mali a Giuvanni. Circau mi nci rispundi cu n'atru messaggiu, mi cerca spiegazzioni, ma non nci riniscìu e nci telefunau ndo telefunu fissu e quandu Giuvanni rispundìu, dopu tanti sunàti, Carmelu ncuminciau mi parra:

Carmelu:  Giuvanni, chi tti succidìu, chi sunnu tutti ssi cunsunanti, chi vò diri, ancora non capiscìa nenti.

Giuvanni:  Curri Carmelu, ndi vidimu nda solita panchina, o solitu postu, ndàiu cosi urgenti mi ti dicu.

Carmelu: Stàtti carmu, dammi tempu mi mi vestu, mi mi mentu carcosa i pisanti chi oi faci troppu friddu, cupàggiti puru tu, si chidhu chi m’à ddiri è cosa longa.

Giuvanni: Non ti prioccupari suggnu ggià cupaggiatu e prontu mi partu, cerca cchiuttostu mi ti movi, cu rriva u primu spetta.

Carmelu: Va bbonu, staju partendo.

Tutt’i ddui rruvaru trafilati. Primu rruvau Giuvanni chi viniva d’ammunti e ndaviva a strata a calata e poi rruvau Carmelu npocu cchiù ffannatu, pà nchianata. Si ssittaru nda panchina senza parrari, nfina mi ripigghjnu u rispiru. Giuvanni ntantu carricava a pipa, mentri Carmelu masticava u so’ sicàrru. Stèsinu nu pocu pinsirùsi, po’ Carmelu fici a sò dumanda.

Carmelu:   Giuvanni chi ti mbattìu, mi ti scatafasci i ssà manèra. Parra, non mi fari stari in pinsèru.

Giuvanni: Atru chi pinsèru! Ccà, si non ndi stamu attenti, ndi scoppia puru u cirivedhu. T’aiu a cuntari nu sonnu chi mi nsunnai stanotti.

Carmelu:     E chi ti putisti nsunnàri, mi sì tantu agitatu. Pari chi ti cavadhìau u fudhittu!

Giuvanni:  Fussi m’era u fudhittu! A cosa è peggiu! Mi nsunnài chi ndo nostru paisi trasìu u malu spiritu e non sulu ndo nostru paisi, forsi ndi tutta a Cumuni. Era dhassùpra, ndè muntagni di Mancùsi, e dì nu saccu tirava fora littìri e i lanciava intra i casi di tutti i cristiani. Ridendu e saddariandu diciva: scialativi, ccà, vi rruvau u rifriscu. Busti a dritta, busti a manca, vulavunu com’i passiri nda marzu, e si zziccavunu sutt’e porti nde casi di cristiani. Chi tu dicu a ttia mi fici mprissioni, mi russigghjiai all’intrasattu tuttu sudatu, eppòi non mi ricordu cchiù nenti. Mi ristau sulu u schjiantu e ancora mi veni mi tremu.

Carmelu:   Bbonu, ora statti carmu, non pinsàri a ssì cosi, dàssa stari u malu spiritu, chi forsi non nc’intra nenti. Cchiuttostu quandu u facisti stu sonnu. Sì ssicuru chi fu stanotti  o passaru carchi para i jorna.

Giuvanni:  Non ti sacciu a ddiri, m’imprissionai tantu chi pari chi mi si sbacantau a testa. Non mi rricordu quandu fu, forsi passaru carchi para i jorna.

Carmelu:  Allùra u malu spiritu non nc’intra. I littìri chi vidisti ì passàu u pustinu. Sunnu raccumandati aerre, cà rricivuta i ritornu, chì mandau a Cumuni a tutti pì pajiari l’acqua, a depurazioni ill’acqua e puru i fognaturi, e du ddumilaeddue an poi. Mi rruvau puru a mmia, sulu c’ancora na japrìa. Anzi l’aju cca cu mmia, ora vidimu quantu mi ttocca.

Carmelu japri a busta e guarda, a lluntana e a mbicina e guarda, a vota suprasutta e guarda, a gira ill’atra parti e guarda e dopu c’a finìu i guardari fici nu saddu da panchina comu quandu cu pigghjiau na scossa i currenti.

Giuvanni:    Chi nc’è, Carmelu, mali nutizzii. Non vidi bbonu, o vidisti u malu spiritu!

Carmelu:  Cosi bboni non vitti, ma forsi è à vista. C’à prescia chi mi facisti mi spirdìa l’occhiali e dhà stampa i catarratta mi faci vidiri mpannatu. Non sugnu tantu cumbintu, vogghjiu vidìri chiaru e poi mi sentu npocu a ngiru nde vicini mi vjiu com’è a sunàta. Ma a ttia non ti rruvau ancora sta littira?

Giuvanni:  Non sacciu mi ti dicu, forsi rruvau. Nciaju a dumandari a mè mugghjieri, cù sapi aundi a mmucciau.

Carmelu:  E dumandici, dumandici, poi mi sai a ddiri. E dumanda puru pì tò parti dha pà mmunti, senti nu pocu tutti i cristiani, l’amici, i parenti. Vidi si nci rruvau puru a idhi sta littira da Cumuni, intanto puru eu m’informu nda mè zzona. Vidimu si carcunu riniscìu mi schjiarisci tutti sti numira.  Ndi vidimu n’atra para i jiorna, ndò stramenti, si nci sunnu novità non mandàri ssimmissi, chi non capisciu nenti, tilefuna cu fissu, sinnò ti chiamu eu. Ora rritiramundi pì casi, ch’ eu sugnu curiusu mi leggiu e mi capisciu chidhu chi nc’è scrittu nda sta littira. Ciau Giuvanni, manteniti bbonu.

Giuvanni:    Ciau Carmelu, ristàmu cusì, ma eu pensu sempri o malu spiritu.

 

U malu spiritu: E fà bbonu mi pensi, ancora u bellu av’à rrùvari. Vai, vai a casa e leggiti a tò littira, ma prima ssettiti nda na seggia bella ferma, non m’à cadìri, si ti pigghja ncorpu. E vidi non mi ti veni u friddu ndè spadhi, comu nci stà vinendu a tutti i fussatoti, e muntubbedishiani, e masidhoti e puru e salinoti. Nc’è friscu e rifriscu pì tutti.

 

Giuvanni sintìu comu nu sùrfuru d’arrèdu, si ggirau ma non vitti nenti, sulu nu nivuledhu chi prestu scumparìu. Carmelu, ntantu era rruvatu versu a farmacia e chianu chianu pà bbasciu si ndi jiva, tuttu pinsirùsu pì dha littira chi ndaviva nda sacchetta, chi ncuminciava mi diventa cchiù pisanti.

Giuvanni nchianava pà sò casa, pur’idhu pinsirùsu, e a ogni puzzettu i ll’acquedottu chi ncuntrava sentiva comu nu zzurrìamentu di rotedhi chi giravunu, mentri ndè puzzetti di novi fognaturi non sentiva nenti, mancu na stampa i puzza. Nci parsi stranu stu finominu e pi mi si ssicura jiva avanti a arrèdu mi controlla, e sempri sentiva stu furri furri i scrusciu. Si schjiantau Giuvanni, cchiù du giustu, e llungau u passu mi si zzicca intra, ndè sò quattru mura, sempri o malu spiritu pinsandu.

 

U malu spiritu: Pensa Giuvanni! Pinsàti tutti paisani! Accamòra  ndè puzzetti nci sugn’eu ed eu cumandu. Mi zziccu ndè tubbi i ll’acqua quandu cala e puru quandu a tagghjinu e mi divertu mi viu i puntaturi chi girinu cull’aria. Dhu scrusciu, dhu zzurriamentu di rotedhi mi pari na musica cilistiali…… scusati vuliva diri …… nfirnali, u massimu du mè divertimentu. E quandu vi manca l’acqua, chì tubbi si sbacantunu, chi billizza quandu rriva l’aria! Si carchi rubbinettu perdi, u puntaturi và a milli. A’ forza i ll’aria esti mprissionanti e nudhu sì nd’accorgi. U puntatori gira e signa l’acqua chi non nc’è. E tutti pajinu i bulletti senza mi sannu chi stanno pajiandu l’aria o postu i ll’acqua. E ndò nbernu vì custringinu mi pajiati l’acqua dì vostr’ortira, l’acqua du mbivirari. Pènsino ch’è piccatu mi scurri ndà fjumara e allora và mandunu ndè casi. E vù pajiati puru l’acqua dà fiumara. Chi divertimentu!

 

Passàru nà para i jorna, Giuvanni e Carmelu si cuntrullaru i carti, i cunfruntaru chi bulletti vecchi e si nd’accurgiru chi cunti non turnavunu, e si telefunaru pì n’atru incontru urgenti, ma, mmalidittu, u tilefunu sunava sempri occupatu. Data l’urgenza chiamaru ddu figghjioli, mi mandunu mbasciata, pinsandu cu telefunu era gguastu. Ma u telefunu non era gguastu. Era chi spaccavunu u sicundu quandu si chiamavunu, pì non smintìri i pinsèri paralleli, pì chistu mutivu sunava sempri occupatu. I ddu figghjioli si dèsinu i mbasciati a mitati caminu e si ndi turnaru pì casi.

Giuvanni e Carmelu, all’ura stabilita dì mbasciati, s’incuntraru nda solita panchina. Ssittàti, ristaru nu pocu pinsirùsi, u tempu mi ricogghjinu i pinsèri e poi unu dissi all’atru: Ncuminci tu o ncuminciu eu. Giuvanni ch’era tutto nfervuriatu e viniva dì na zona russa dicidìu mi ncumincia prima idhu.

Giuvanni:    Carmelu, eu sugnu sempri cchiù cumbintu chi nc’esti u malu spiritu. L’atra vota n’ ò vitti ma u sintìa. Era ndè puzzetti i ll’acqua chi rufulìava ndi tutti i puntaturi. I’ nu puzzettu nisciva e ndi n’atru zziccava. Pariva nu furminu. Si sentiva sulu u scrusciu i ll’aria. Sugnu ancora ntrubuliatu dà paura chi pigghjiai.

Carmelu:  Ncuminciu mi mi mentu a mpinsèru pur’eu. Non mi sentu tantu sicuru. Cchiuttostu a littira a truvasti?

Giuvanni: A truvai… no mm’era parutu mai! Era ndo tiraturi du barò, mucciàta nde linzòla. Mè mugghjieri si sbarruau quandu liggìu tutti dhi numira e vuliva no mma vìu, chì si schjiantava non mi mi pigghjia cosa.

Carmelu.  E ndaviva rraggiuni cchiù du ggiustu. A ttia i cosi storti non ti piacinu e imbestialisci, e quandu mbestialisci nò rraggiuni e po’ fari carchi fissarìa e po’ si senti mali. E nda littira ndavi tanti cosi storti. Esti na fattura di pajiari, ma nc’è na cosa strana chi non mi cumbinci. Sunnu numira strani. U puntaturi i ll’acqua signa centu metri cubbi chi trasìru, ma ill’atra parti depurunu ducentu. Forsi chi l’acqua intra i tubbi si raddoppia e carchi vota puru si quatruplica. Chistu esti nu teorema c’à scola non ndu ficinu studiari, o forsi u sparmintaru ora e u mplementaru nde cumpiuter da Cumuni. Non sacciu chidhu chi mi pensu. Forsi ndà rraggiuni tu…..mi veni mi pensu ch’esti na fattura, na brutta fattura e forsi nci voli a zzinghira m’à caccia. Chi ssi dici dha pà mmunti, i vicini à rriciviru ?  O simu sulu nui i fissa du paisi!

Giuvanni:  A’ rriciviru tutti e vannu strati strati sventuliandu circandu rraggiuni i stu mistero!

Carmelu:  Allora è veru! Puru pà bbasciu i cosi su cusì. Esti nu subbuglio generali. Ncuminciu mi pensu ò malu spiritu pur’eu.

U malu spiritu: Ccà, ccà sugnu! Non mi viditi ma eu vi tegnu d’occhiu. Sugnu cca ssittatu ncima ò monumentu di vostri morti à guerra, chidhi chi partiru e non turnaru, e mancu u sò nomu ccà nci muntuaru. Cu vui vogghiu parrari, basta chi non vi trimulìati, e……. ndajiu cosi mi vi cuntu!  Cchiù d’unu jiu a Montubedhu mi reclama ndo palazzu comunali, ma, sartu ciravuluni, nudhu nci dèsi raggiuni. I’ ficirnu jiri ccà, i ficinu jri dhà, nchjanàri pì supra, scindìri pì ssutta, ma sempri a stessa solfa…. Forsi nc’esti carchi sbagghjiu, ma s’avi a pajiari u stessu, nc’esti na leggi nazzionali e cù è llacciatu e puru cù no, avi a contribuiri puru pà fognatura. Cosi i ll’atru mundu! Ed eu, malu spiritu, ill’atru mundu, ndi capisciu carcosa! Comu n’hacher trasìa nde compiuter, controllai l’ardischi, i memorii ram, i linchi e tutti i cartelli e suttacartelli, tuttu funziona, i cumpiuter sù a postu. Allùra trasìa nde cirivedhi e cca mpuntau u carru! I jidita battivunu nda tastèra sempri i stessi numira comu quandu chi consumi i ll’acqua erunu sempri i stessi annu dopu annu, mancu nu decilitru i differenza, pà depurazioni e a fognatura, mentri u cunsumu i ll’acqua nde puntaturi era a mità e carchi vota puru nu quartu.

Carmelu:  Senti malu spiritu, fermiti nu pocu. I cosi chi ndi stà cuntandu ndi mentinu in pinsèru, vò diri forsi chi nc’è carcunu chi ndi voli buzzarriari mi ndi caccia i soddi dà sacchetta?

Giuvanni: Eu vogghju sapìri cù è chi duna l’ordini a ssi cristiani mi mentinu numira a casacciu. Ccà sù soddi e sunnu soddi assai, non sunnu nucidhi mericani, e vogghjiu sapìri quali strati pigghjinu, aundi vannu a finìri. Tu, malu spiritu, sà nenti, datu chi ggiriasti stanzi stanzi ?

Carmelu: Eu vogghjiu sapìri n’atra cosa. Com’esti l’acqua dà fiumara chi cala nde nostri rubinetti?  Dinnu chi passa dù sarbatojiu e veni pulizzata, ma nui chi mbivimu? Avimu a ccattàri l’acqua minerali?

U malu spiritu:  Non parràti d’acqua minerali!  non niscìti ndà ssì discursi! E non dicìti mancu chi jiti a castagnara, a jargianò o è filési mi pigghjiati l’acqua chi mbiviti. Carchi cirivedhu sta spittàndu u tradimentu. Pòti capitari chi nda ll’ingenuità carcunu va mi dici chi ll’acqua chi si mbivi non è du puntaturi. Idhi, chistu stanno spittàndu! U sò raggiumamentu è matematicu. Esti veru chi nà mbiviti, però à pisciati e nui l’avimu a depurari, e depurunu puru chidha chi pisciati nde campagni, anzi stàti attenti nò mi vi chiamunu pì l’inquinamentu!

Giuvanni e Carmelu:  Azzu, puru chissu nc’è!

U malu sipritu:    Chistu e atru! cchiuttostu stàti all’erta. Vù stessi cuntrullastuvu i littìri chì rruvaru ndo paisi, vidistivu i numira e vidistivu i dati di littùri. Pari c’à carcunu ncià ficinu cchiù i nseculu arredu, a carc’atru nci misinu a data alla mericana, prima u misi poi u jornu e poi l’annu, ma non mi risulta chi ndo calandariu  ndavi anni cù quattordici, chindici, o vintitrì misi. Stanno ribbaltandu tutti i dati, forsi ndannu prescia e a prescia faci sbagliari.

Carmelu:   Scusa, malu spiritu, ma pirch’ t’impegni tantu, pirchì ndi duni tutti ssi cunsigghj. Contraddici a tò figura. Nui a stu punto non capiscimu nenti, ndavimu bisognu i ll’abbucatu.

U malu spiritu:  Ora vi dicu na cosa, ma mi rresta tra di nui, non vogghju mi si sapi a ngiru. Eu sugnu malu spiritu, ma non sugnu nu spiritu malu. U vostru abbucatu sugnu eu !

Carmelu :  No, no, non è pussibuli. Chi vò diri, chi và puru ò tribunali?

U malu sipiritu:  No, chissu nò pozzu fari, ma a leggi và pozzu ricurdari e, quandu nc’è tortu è tortu, e, quandu nc’è rraggiuni, nc’è rraggiuni!

Giuvanni: E chi ndi dici, nda sti littìri ndavimu tortu, a leggi chi dici?

U malu spiritu:  Ndaviti rraggiuni e ndaviti tortu, ndaviti tortu e ndaviti rraggiuni!

Giuvanni e Carmelu:  Spieghiti megghjiu, chì non capiscimmu nenti.

U malu spiritu:  Eccu chi vi spiegu: Nc’era na bella leggi ndo vostru ordinamentu legislativu, era a tricentudiciannovi du deci maggiu du sittantasei e cù chidha leggi ndavivivu rraggiuni.

Carmelu e Giuvanni:   E chi ddiciva, chi ddiciva, vidimu si ndi putimu appellari.

U malu spiritu:  Purtroppu non putiti fari nenti. Era na leggi giusta chi non faciva pajiari depurazzioni e fognaturi aundi non nc’erunu i fognaturi e mancu llacciamenti nde puzzetti, ma comu tanti leggi giusti à sopprimiru.

Giuvanni e Carmelu: E ora pirchì ndavimu tortu?

U malu spiritu:  Pirchì nc’è na nova leggi ch’esti chiamata leggi “Galli”. A’  ficinu ndo novantaquattru, ò cincu ginnaru e porta u numiru trentasei. E l’articulu quattordici vi duna tortu. Basta chi nda Cumuni nci sunnu quattru tubbi i fognaturi, oppure chilomitri, e nc’esti nu depuraturicchjiu, si funziona o non funziona, si siti llacciati oppure non siti, aviti a pajiari u stessu. “Dura lex sed lex”, diceva u nticu romanu.

Giuvanni:  Chi leggi stramba! Ma puru vulendu, mi dumandu e ddicu, comu fannu chidhi chi stannu nda via dì santi martiri traversa prima e traversa sicunda ch’esti ì sutta, mi s’allaccinu ndo puzzettu i via dì santi martiri ch’esti i supra???

Carmelu:  Caru Giuvanni ccà mi schjiantu chi finimu comu nda favula ì Fedru. Quandu u lupu dicidi mi si mangia u gnedhu a scaggiuni à trova. Mi veni mi pensu: poveri ciavuredhi e tanti cràpi finiru tutt’aniti nde sdirrùpi, ma forsi non è cusì, non mi rricordu bbonu.

Giuvanni: O ti rricordi bbonu o ti rricordi malu non faci differenza, simu dhà. Malu spiritu, comu ndavimu a cumpurtari, dunindi nu cunsigghjiu d’abbucatu.

U malu spiritu:  Comu vi diciva prima, purtroppu aviti a pajiari. Però vi jiapru l’occhj. Cuntrullativi tutti i fatturi, facitivi i cunteggi e si nc’è sbagghjiu reclamati, puru a bbuci forti, ndaviti tutti i diritti! Comu ndaviti dirittu mi siti presenti quandu fannu a littura dù puntaturi i ll’acqua. Pritinditi l’avvisu e si non vù fannu circàtinci a fotografia du puntaturi mi siti sicuri ch’esti u vostru. N’atra cosa nciaviti a rricurdari, i fatturi sù fatturi e non ponn’essiri avvisu di messa in mora, è cuntra à leggi. Dicitinci mi si ripassunu nu pocu u dirittu privatu.  N’atra cosa vajiu a ddiri: Si ttruvati differenza tra cunsumu e richiesta ì pajiamentu, ì putiti dinunciari. Annu a rrispundiri a nu reatu gravi, nu reatu penali. Si tratta ì truffa nde vostri cunfrunti, si tratta d’estorsioni. Pinsàtinci! Ora vi salutu chì mi scadìu u tempu, ma tornu prestu, chista è a mè zzona, restu nde cumbicinàti. Rricurdativi chi trasu e nesciu quandu vogghjiu e aundi vogghjiu, e sugnu sempri a vostra disposizioni. Ora dàtivi na scrollatedha, parrati chì paisani, strùitili mi sunnu cchiù civili, mi ndannu cchiù rispettu pù paisi, pì fiumari, pì l’ambienti, pì idhi stessi e pì tutti, puru pì chidhi chi sbagliunu in bbona fedi….si nci sunnu. E rricurdatinci chì diritti vannu i pari passu chì duviri. E cù faci u sò duviri poti jazzàri a testa mi reclama i sò diritti. A prossima vota facimu nu discursu cchiù longu pirchì ndajiu ancora tanti cosi i diri.

Chistu dissi u malu spiritu e comu nu surfaloru nda n’attimu sparìu.

Giuvanni e Carmelu ristàru nnichiluti, senza palòri e chi robbi chi nci cadivunu d’ancòdhu. Rristaru nda panchina pinsirùsi, senza forza mi si ndi vannu pà casa. Cusì ì truvaru a matina i jurnatari. Erunu ancora ddurmintàti, ma l’ occhji l’avivunu “aperti”.  

P.S. : Questa volta niente P.S., mi schjiantu pur’eu du malu spiritu, armenu nfina mi pigghjiu confidenza, speriamu ch’esti di nostri parti, comu dissi, armenu ndi canusci e sapi com’à pinsàmu. 

Un caro saluto.

Francesco Pellicanò vinti, quasi vintunu ginnaru ddumilaeottu.